ಇಲ್ಲಿನ ಒಂದೊಂದು ಪಾತ್ರದ ವ್ಯಕ್ತಿತ್ವವೂ ಅದರದೇ ರೀತಿಯಲ್ಲಿ ಇಷ್ಟವಾಗುತ್ತದೆ. ಇಲ್ಲಿ ಯಾರ ದೋಷವೂ ಇಲ್ಲ. ಎಲ್ಲವೂ ಸಂದರ್ಭ ಅಷ್ಟೆ. ಕಾದಂಬರಿ ಆಧಾರಿತ ಕತೆಗಳ ಮಾದರಿಯಲ್ಲಿರುವ ಒಂದು ಸಾಂಪ್ರದಾಯಿಕ ಕತೆ ಇದು. ‘ಏಕ್‌ ನಿರ್ಣಯ್‌’ ಮರಾಠಿ ಸಿನಿಮಾ ಅಮೇಜಾನ್‌ ಪ್ರೈಂನಲ್ಲಿ ಸ್ಟ್ರೀಮ್‌ ಆಗುತ್ತಿದೆ.

ಇಶಾನ್ ಮಕ್ಕಳ ತಜ್ಞ. ಸ್ವತಃ ಅವನಿಗೆ ಮಕ್ಕಳಿಲ್ಲ. ಹೃದಯ ವೈದ್ಯೆಯಾದ ಅವನ ಹೆಂಡತಿ ಮುಕ್ತಾಗೆ ಮಕ್ಕಳು ಬೇಕಾಗಿಲ್ಲ. ಅವಳಿಗೆ ಅವಳ ವೃತ್ತಿಜೀವನದ ಮುಂದಿನ ಹೆಜ್ಜೆಗಳ ಬಗ್ಗೆ ಇನ್ನಿಲ್ಲದ ಮಹತ್ವಾಕಾಂಕ್ಷೆ! ಇಬ್ಬರೂ ವೈದ್ಯರು. ಪ್ರೀತಿಸಿ ಮದುವೆಯಾಗಿದ್ದಾರೆ. ಅವನದು ಅಮ್ಮ, ಅಣ್ಣ, ಅತ್ತಿಗೆ ಎಲ್ಲರೂ ಇರುವ ಸಾಂಪ್ರದಾಯಿಕ ತುಂಬುಕುಟುಂಬ. ಅವಳದು ಒಬ್ಬಳೇ ಮಗಳಿಗೆ ಎಲ್ಲ ರೀತಿಯಲ್ಲೂ ಬೆಂಬಲವಾಗಿರುವ ತಂದೆತಾಯಿಗಳಿರುವ ಪುಟ್ಟ ಕುಟುಂಬ. ಮಕ್ಕಳು ಬೇಕೆಂದು ಅವನಿಗೂ ಇಷ್ಟ. ಮನೆಯವರಿಗೂ. ಆದರೆ ಅವಳು ಒಂದು ಹಂತದಲ್ಲಿ ಖಂಡಿತಾ ತನಗೆ ಮಗು ಮಾಡಿಕೊಳ್ಳಲು ಇಷ್ಟವಿಲ್ಲ ಅಂದಾಗ ಬಿರುಕಾಗುತ್ತದೆ. ಅವರು ದೂರವಾಗುತ್ತಾರೆ. ನಿನ್ನ ಬದುಕು ನಿನ್ನ ಆಯ್ಕೆ ಅನ್ನುವ ತಂದೆಯ ಮನೆಗೆ ಮರಳುತ್ತಾಳೆ.

ಆದರೆ ಇಶಾನ್ ಫೋಟೋವನ್ನೇ ತನ್ನ ಕಂಪ್ಯೂಟರ್ ಪರದೆಗೆ ಹಾಕಿಕೊಂಡಿದ್ದಾಳೆ. ಅಂದುಕೊಂಡಂತೆ ಮುಕ್ತಾ ವೃತ್ತಿಜೀವನ ಯಶಸ್ಸಿನ ಉತ್ತುಂಗ ತಲುಪುತ್ತದೆ. ಇತ್ತ ಮನೆಯವರ ಒತ್ತಾಯಕ್ಕೆ ಅವನು ಫಿಸಿಯೋಥೆರಪಿಸ್ಟ್ ಆಗಿದ್ದ ಹುಡುಗಿಯ ಮಾನಸಿಯನ್ನು ಮದುವೆಯಾಗುತ್ತಾನೆ. ಅವಳೋ ಪಾಪ, ಅಕ್ಕ – ಭಾವನ ಪ್ರೀತಿಯ ಮಗು. ಮುಗ್ದೆ. ಬದುಕಿನಲ್ಲಿ ಅಂತಹ ಮಹತ್ವಾಕಾಂಕ್ಷೆ ಏನೂ ಇಲ್ಲದವಳು. ಆದರೆ ಅವಳಿಗೆ ಕಟ್ಟಿದ ಗರ್ಭ ನಿಲ್ಲುವುದಿಲ್ಲ. ಅವಳ ಗರ್ಭದಲ್ಲೇ ಸಮಸ್ಯೆ. ಇತ್ತ ಮುಕ್ತಾಳ ತಂದೆ, ತಾಯಿ ಅಪಘಾತದಲ್ಲಿ ತೀರಿಕೊಳ್ಳುತ್ತಾರೆ. ಒಂಟಿಯಾದ ಇವಳಿಗೆ ಒಂದು ಮಗುವಿನ ತೀವ್ರ ಬಯಕೆಯಾಗುತ್ತದೆ. ಅದಕ್ಕಾಗಿ ಬಿಟ್ಟ ಗಂಡನನ್ನೇ ಮತ್ತೆ ಕೇಳುತ್ತಾಳೆ. ಇದೀಗ ಇಕ್ಕಟ್ಟು. ಮಗು ಬಯಸುವ ಮುಕ್ತಾ ನೊಂದಿದ್ದಾಳೆ. ಒಂಟಿಯಾಗಿದ್ದಾಳೆ. ಹಾಗೆಂದು ಎರಡನೇ ಹೆಂಡತಿ ಮಾನಸಿಗೂ ಮೋಸ ಮಾಡುವಂತಿಲ್ಲ. ಆಕೆಯೂ ನೊಂದವಳೇ. ಈಗ ಒಂದು ತೀರ್ಮಾನಕ್ಕೆ ಬರಬೇಕಲ್ಲ. ಅದೇ ‘ಏಕ್ ನಿರ್ಣಯ್’.

ಈ ನಿರ್ಣಯ ಮಾಡುವವರು ಯಾರು? ತಾಯ್ತನ ಅಂದರೇನೆಂದು ಆ ಕನಸುಕಂಗಳ ಪುಟ್ಟ ಹುಡುಗಿ ಮಾನಸಿಗೆ ನಿಜವಾಗಿಯೂ ಅರ್ಥಮಾಡಿಸುವವರು ಯಾರು? ಜೀವನದಲ್ಲಿ ಈವರೆಗೂ ಸ್ವಂತಕ್ಕೆ ಒಂದೇ ಒಂದು ನಿರ್ಧಾರ ತೆಗೆದುಕೊಳ್ಳದ ಮಾನಸಿ ಕೊನೆಗೆ ಪ್ರಬುದ್ದಳಾಗಿ ಬದಲಾಗುವ ಬಗೆ ಯಾವುದು? ಯಾವುದಕ್ಕೂ ಧಕ್ಕೆಯಾಗದ ಹಾಗೆ, ಯಾವ ಭಾವನೆಗಳಿಗೂ ಘಾಸಿಯಾಗದ ಹಾಗೆ ಇಶಾನ್ ಏನು ಮಾಡುತ್ತಾನೆ? ಗಂಡನಿಗೆ ಬೈ ಹೇಳಿ ಕಾರಿಗೊರಗಿ ಮಾನಸಿ ನಗುವ ಕಡೆಯ ದೃಶ್ಯದಲ್ಲಿ ಸ್ವಲ್ಪ ಉದಾರವಾಗಿದ್ದರೆ ಬದುಕೆಷ್ಟು ಸಲೀಸು ಎಂಬ ಸಂದೇಶವಿದೆ. ತ್ರಿಕೋನ ಪ್ರೇಮಕತೆಗಳು ಬೇಕಾದಷ್ಟಿವೆ. ಆದರೆ ಈ ಕತೆ ಸಂಸಾರದ ಬಿಕ್ಕಟ್ಟುಗಳು, ಅನಿರೀಕ್ಷಿತ ತಿರುವುಗಳ ಜೊತೆ ಸಹಜವಾಗಿ ಅರಳಿದೆ. ಒಂದೊಂದು ಪಾತ್ರದ ವ್ಯಕ್ತಿತ್ವವೂ ಅದರದೇ ರೀತಿಯಲ್ಲಿ ಇಷ್ಟವಾಗುತ್ತದೆ. ಇಲ್ಲಿ ಯಾರ ದೋಷವೂ ಇಲ್ಲ. ಎಲ್ಲವೂ ಸಂದರ್ಭ ಅಷ್ಟೆ. ಕಾದಂಬರಿ ಆಧಾರಿತ ಕತೆಗಳ ಮಾದರಿಯಲ್ಲಿರುವ ಒಂದು ಸಾಂಪ್ರದಾಯಿಕ ಕತೆ ಇದು. ಆದರೆ ಅದನ್ನು ಪ್ರಸ್ತುತಪಡಿಸಿದ ರೀತಿಯಲ್ಲಿ, ಪಾತ್ರಗಳ ವ್ಯಕ್ತಿತ್ವದಲ್ಲಿ ಸಾರ್ವಕಾಲಿಕತೆ ಇದೆ. ‘ಏಕ್ ನಿರ್ಣಯ್’ ಎಂಬ ಆ ನಿರ್ಧಾರ ಪ್ರಬುದ್ಧವಾಗಿದೆ.

Previous articleIndian Film Festival of Melbourne Awards; ರಣವೀರ್‌ ಸಿಂಗ್‌ ಅತ್ಯುತ್ತಮ ನಟ
Next articleTPL ಪಂದ್ಯಾವಳಿಯ ಜೆರ್ಸಿ, ಟ್ರೋಫಿ ಬಿಡುಗಡೆ; ಕಿರುತೆರೆ ಕಲಾವಿದರ ಕ್ರಿಕೆಟ್
Avatar
ಕುಸುಮ ಆಯರಹಳ್ಳಿ ಫ್ರೀಲ್ಯಾನ್ಸ್‌ ಬರಹಗಾರ್ತಿ. ಹಲವು ಕಿರುತೆರೆ ಧಾರಾವಾಹಿ ಮತ್ತು ಮತ್ತು ಸಿನಿಮಾಗಳಿಗೆ ಚಿತ್ರಕಥೆ - ಸಂಭಾಷಣೆ ಬರೆದಿದ್ದಾರೆ. ಪ್ರಸ್ತುತ ‘ವಿಜಯ ಕರ್ನಾಟಕ’ ದಿನಪತ್ರಿಕೆ ಅಂಕಣಕಾರ್ತಿ. ‘ಯೋಳ್ತೀನ್ ಕೇಳಿ’ ಅವರ ಪ್ರಕಟಿತ ಪ್ರಬಂಧ ಸಂಕಲನ.

LEAVE A REPLY

Connect with



Please enter your comment!
Please enter your name here