ಬಿಗ್‌ಬಾಸ್‌ ಮನೆಯಲ್ಲಿ ಮಣ್ಣಿನಲ್ಲಿ ಆಡುವ ಟಾಸ್ಕ್ ವೇಳೆ ಸ್ಪರ್ಧಿಗಳು ಪರಸ್ಪರ ಎಳೆದಾಡಿಕೊಂಡಿದ್ದಾರೆ. ಈ ವೇಳೆ ಚೈತ್ರಾ ಅವರ ಉಂಗುರ ಬಿದ್ದು ಹೋಗಿತ್ತು. ಕೆಸರು ಮಣ್ಣಿನಲ್ಲಿ ಬಿದ್ದಿದ್ದ ಉಂಗುರವನ್ನು ಸಹಸ್ಪರ್ಧಿ ತ್ರಿವಿಕ್ರಮ್‌ ಹುಡುಕಿಕೊಟ್ಟರು. ನಿರಾಳರಾದ ಚೈತ್ರಾ ಕೊರಗಜ್ಜನಿಗೆ ಕೈ ಮುಗಿದಿದ್ದಾರೆ.
ಬಿಗ್ ಬಾಸ್ ಮನೆಯಲ್ಲಿ ಟಾಸ್ಕ್ ನಡುವೆ ಸ್ಪರ್ಧಿ ಚೈತ್ರಾ ಕುಂದಾಪುರ ಕಳೆದುಕೊಂಡ ಉಂಗುರ ವಾಪಸ್ ಸಿಕ್ಕಿದೆ. ಉಂಗುರ ಕಾಣೆಯಾದಾಗ ಕೊರಗಜ್ಜನ ಮೊರೆ ಹೋಗಿದ್ದ ಚೈತ್ರಾ, ಅದು ಸಿಕ್ಕಿದೊಡನೆ ದೈವಕ್ಕೆ ಧನ್ಯವಾದ ಹೇಳಿದ್ದಾರೆ. ದೊಡ್ಮನೆಯ ಟಾಸ್ಕ್ ಒಂದರಲ್ಲಿ ಮಣ್ಣಿನಲ್ಲಿ ಆಟವಾಡಬೇಕಿತ್ತು. ತಮಗೆ ಕೊಟ್ಟ ಜಾಗದಲ್ಲಿ ಮಣ್ಣನ್ನು ಸರಿಯಾಗಿ ಜೋಡಿಸಿ ಮಣ್ಣಿನಿಂದ ಮಾಡಿದ ಅಕ್ಷರವನ್ನು ಯಾರೂ ಹಾಳು ಮಾಡದಂತೆ ನೋಡಿಕೊಳ್ಳುವುದು ಆಟದ ನಿಯಮವಾಗಿತ್ತು. ಸ್ಪರ್ಧಿಗಳೆಲ್ಲರೂ ತಮಗೆ ನೀಡಿದ ಜಾಗ ಮತ್ತು ಅದರಲ್ಲಿ ಬರೆಯಲಾದ ಮಣ್ಣಿನ ಅಕ್ಷರವನ್ನು ಕಾಪಾಡುವುದರಲ್ಲಿ ನಿರತರಾಗಿದ್ದರು. ಸುಮಾರು ಹೊತ್ತು ಮಣ್ಣಿನಲ್ಲಿ ಈ ಆಟ ನಡೆದಿದ್ದು, ಆಟದ ವೇಳೆ ಸ್ಪರ್ಧಿಗಳು ಪರಸ್ಪರ ಎಳೆದಾಡಿಕೊಂಡಿದ್ದಾರೆ. ಈ ವೇಳೆ ಚೈತ್ರಾ ಅವರ ಉಂಗುರ ಬಿದ್ದು ಹೋಗಿದೆ.
ಅದು ತುಂಬಾ ಮುಖ್ಯವಾದ ಉಂಗುರ, ಟಾಸ್ಕ್ ವೇಳೆ ಬಿದ್ದು ಹೋಗಿದೆ ಎಂದಾಗ ಇತರ ಸ್ಪರ್ಧಿಗಳೂ ಉಂಗುರ ಹುಡುಕಲು ಚ್ರೈತ್ರಾ ಅವರಿಗೆ ಸಹಾಯ ಮಾಡಿದ್ದಾರೆ. ಉಂಗುರ ಹುಡುಕುವಾಗ ಚೈತ್ರಾ ಮನಸ್ಸಿನಲ್ಲೇ ದೇವರಲ್ಲಿ ಪ್ರಾರ್ಥಿಸುತ್ತಿದ್ದರು. ಕೆಸರು ಮಣ್ಣಿನಲ್ಲಿ ಬಿದ್ದಿದ್ದ ಉಂಗುರವನ್ನು ಸಹಸ್ಪರ್ಧಿ ತ್ರಿವಿಕ್ರಮ್‌ ಹುಡುಕಿಕೊಟ್ಟರು. ನಿರಾಳರಾದ ಚೈತ್ರಾ ಕೊರಗಜ್ಜನಿಗೆ ಕೈ ಮುಗಿದಿದ್ದಾರೆ. ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಕಾರಣಿಕದ ದೈವ ಕೊರಗಜ್ಜ. ಕಳೆದು ಹೋದ ಯಾವುದೇ ವಸ್ತುವನ್ನು ಮರಳಿ ಪಡೆಯಲು, ತಮ್ಮ ಇಷ್ಟಾರ್ಥ ಸಿದ್ಧಿಗಳಿಗಾಗಿ ಜನರು ಕೊರಗಜ್ಜನ ಮೊರೆ ಹೋಗುತ್ತಾರೆ. ಇಲ್ಲಿಯೂ ಚೈತ್ರಾ ಕೊರಗಜ್ಜನ ಮೊರೆ ಹೋಗಿದ್ದು, ಮಣ್ಣಿನಲ್ಲಿ ಬಿದ್ದ ಉಂಗುರ ವಾಪಸ್ ಸಿಕ್ಕಿದೆ.
