ನಾಗಚೈತನ್ಯ ಮತ್ತು ಸಾಯಿ ಪಲ್ಲವಿ ನಟನೆಯ ಥಂಡೇಲ್‌’ ತೆಲುಗು ಸಿನಿಮಾದ ಟ್ರೇಲರ್‌ ರಿಲೀಸ್‌ ಆಗಿದೆ. ರೊಮ್ಯಾನ್ಸ್‌, ಡ್ರಾಮಾ ಜೊತೆ ದೇಶಭಕ್ತಿಯ ಎಳೆಯನ್ನೂ ಚಿತ್ರಕಥೆಯಲ್ಲಿ ಹೆಣೆದಿದ್ದಾರೆ ನಿರ್ದೆಶಕ ಚಂದು ಮೊಂಡೇಟಿ. Geetha Arts ಪ್ರೊಡಕ್ಷನ್ಸ್‌ ನಿರ್ಮಾಣದ ಸಿನಿಮಾ ಮುಂದಿನ ತಿಂಗಳು ಫೆಬ್ರವರಿ 7ಕ್ಕೆ ತೆರೆಕಾಣಲಿದೆ.
ಚಂದು ಮೊಂಡೇಟಿ ನಿರ್ದೇಶನದ ‘ಥಂಡೇಲ್‌’, ಈ ವರ್ಷದ ಬಹುನಿರೀಕ್ಷಿತ ಸಿನಿಮಾಗಳಲ್ಲೊಂದು. ನಾಗ ಚೈತನ್ಯ ಮತ್ತು ಸಾಯಿ ಪಲ್ಲವಿ ನಟನೆಯ ಸಿನಿಮಾ ಮುಹೂರ್ತದ ದಿನದಿಂದಲೂ ಸುದ್ದಿಯಲ್ಲಿತ್ತು. ಸುದೀರ್ಘ ಚಿತ್ರೀಕರಣದ ನಂತರ ಸಿನಿಮಾ ತೆರೆಗೆ ಸಿದ್ಧವಾಗಿದ್ದು, ಇಂದು ಟ್ರೇಲರ್‌ ರಿಲೀಸ್‌ ಆಗಿದೆ. ಟ್ರೇಲರ್‌ನಲ್ಲಿ ನಾಗ ಚೈತನ್ಯ ಮತ್ತು ಸಾಯಿ ಪಲ್ಲವಿ ಪ್ರೀತಿ, ರೊಮ್ಯಾನ್ಸ್‌ಗೆ ಹೆಚ್ಚು ಜಾಗವಿದೆ. ಮೀನುಗಾರನ ಪಾತ್ರದಲ್ಲಿರುವ ನಾಗ ಚೈತನ್ಯ ಅವರಿಗೆ ಈ ಬಾರಿ ಹೆಚ್ಚು ಆಕ್ಷನ್‌ ಇದೆ ಎನ್ನುವುದೂ ತಿಳಿದುಬರುತ್ತದೆ. ಲವ್‌ಸ್ಟೋರಿ ಜೊತೆ ದೇಶಭಕ್ತಿಯ ಎಳೆಯನ್ನು ಸೇರಿಸಿ ನಿರ್ದೇಶಕರು ಚಿತ್ರಕಥೆ ಹೆಣೆದಿದ್ದು, ಇಂಟೆನ್ಸ್‌ ಡ್ರಾಮಾ ಕಾಣಿಸುತ್ತದೆ.
ಸಾಯಿ ಪಲ್ಲವಿ ಮತ್ತು ನಾಗ ಚೈತನ್ಯ 2021ರ ‘ಲವ್ ಸ್ಟೋರಿ’ ತೆಲುಗು ಚಿತ್ರದಲ್ಲಿ ಜೊತೆಯಾಗಿ ನಟಿಸಿದ್ದರು. ‘ಲವ್ ಸ್ಟೋರಿ’ ನಂತರ ಎರಡನೇ ಬಾರಿ ಜೊತೆಯಾಗುತ್ತಿರುವ ನಾಗಚೈತನ್ಯ – ಸಾಯಿ ಪಲ್ಲವಿ ಸಿನಿಮಾ ಬಗ್ಗೆ ಅಭಿಮಾನಿಗಳಲ್ಲಿ ನಿರೀಕ್ಷೆಯಿದೆ. ಅಲ್ಲು ಅರವಿಂದ್‌ ಅವರ Geetha Arts Productions ಬ್ಯಾನರ್‌ ಅಡಿ ನಿರ್ಮಾಣವಾಗಿರುವ ಚಿತ್ರಕ್ಕೆ ದೇವಿಶ್ರೀ ಪ್ರಸಾದ್‌ ಸಂಗೀತ, Shamdat ಛಾಯಾಗ್ರಹಣವಿದೆ. ಮುಂದಿನ ತಿಂಗಳು ಫೆಬ್ರವರಿ 7ರಂದು ಸಿನಿಮಾ ತೆರೆಕಾಣಲಿದೆ.
