ಚಿತ್ರವನ್ನು ಸಿನಿಮ್ಯಾಟಿಕ್‌ ಉದ್ದೇಶಗಳಿಗೆ ನೋಡುವ, ಸಂದೇಶದ ಹೆಸರಲ್ಲಿ ಪ್ರೇಕ್ಷಕರಿಗೆ ಪಾಠ ಮಾಡುವುದು ಅವರ ಬುದ್ದಿವಂತಿಕೆಯನ್ನೇ ಕಡೆಗಣಿಸಿದಂತೆ ಎಂಬ ಅಭಿಪ್ರಾಯದ ವ್ಯಕ್ತಿ ನೀವಾಗಿದ್ದರೆ ಈ ಚಿತ್ರ ನಿಮಗಲ್ಲ. ಚಿತ್ರ ಉತ್ತಮ ಸಂದೇಶವನ್ನು ಹೊಂದಿರಬೇಕು ಮತ್ತು ಅದು ಗಟ್ಟಿ ಮತ್ತು ಸ್ಪಷ್ಟವಾಗಿರಬೇಕು ಎಂದು ನೀವು ಬಯಸುವವರಾದರೆ ಈ ಚಿತ್ರ ನಿಮಗೆ ಮೆಚ್ಚುಗೆಯಾಗುತ್ತದೆ.
ಬಾಲಿವುಡ್‌ನ ಮೂವರು ಖಾನ್‌ಗಳು ಚಿತ್ರರಂಗ ಪ್ರವೇಶಿಸಿದ್ದು, ಸುಮಾರು ಒಂದೇ ಕಾಲಘಟ್ಟದಲ್ಲಿ. ಮೂವರೂ ತಮ್ಮ ಚಿತ್ರಗಳ ಮೂಲಕ ತಮ್ಮದೇ ಪ್ರತ್ಯೇಕ ಇಮೇಜ್ ಬೆಳೆಸಿಕೊಂಡವರು. ಈ ಮೂವರ ಪೈಕಿ ಅಮೀರ್‌ಖಾನ್ ಇಮೇಜ್ ಸ್ವಲ್ಪ ವಿಶಿಷ್ಟವಾದದ್ದು. ಯಾವುದೇ ಇಮೇಜ್ ಇಲ್ಲ ಎಂಬುದೇ ಅವರ ಇಮೇಜ್ ಅಗಿ ಬಿಟ್ಚಿದೆ. ಈ ನಿಟ್ಟಿನಲ್ಲಿ ‘ತಾರೇ ಝಮೀನ್ ಪರ್’… ಅಮೀರ್ ಖಾನ್‌ ಚಿತ್ರ ಜೀವನದ ಒಂದು ಪ್ರಮುಖ ಮೈಲುಗಲ್ಲು. ಅದಕ್ಕೆ ಮೊದಲು ಕೂಡ ಅಮೀರ್ ಖಾನ್‌ರ ಕೆಲವು ಚಿತ್ರಗಳು ಸಾಮಾಜಿಕ ಸಂದೇಶದ ಸುತ್ತ ಹೆಣೆಯಲ್ಪಟ್ಟಿದ್ದರೂ, ತಾರೇ…. ಚಿತ್ರದ ಯಶಸ್ಸು ಅಮೀರ್ ಅವರಿಗೆ ಅವರ ದಾರಿಯನ್ನು ಸ್ಪಷ್ಟವಾಗಿ ತೋರಿಸಿಕೊಟ್ಟಿತು.
ಹೀಗಾಗಿಯೇ ತಾರೇ…. ಚಿತ್ರದ ನಂತರದಲ್ಲಿ ಸಾಮಾಜಿಕ ಸಂದೇಶವುಳ್ಳ, ಸದಭಿರುಚಿಯ ಚಿತ್ರಗಳೇ ಅವರ ಬಹುತೇಕ ಚಿತ್ರ ಜೀವನವನ್ನು ನಿರೂಪಿಸಿವೆ. ಅದೇ ಹಾದಿಯಲ್ಲಿ ಸಾಗುತ್ತಾ ‘ಸತ್ಯಮೇವ ಜಯತೇ’ ಕಾರ್ಯಕ್ರಮವನ್ನು ಮಾಡಿ ಯಶಸ್ಸು ಗಳಿಸಿದ ಅಮೀರ್, ತಮ್ಮ ಇಮೇಜ್ ಅನ್ನು ಗಂಭೀರವಾಗಿ ತೆಗೆದುಕೊಂಡಿದ್ದಾರೆ ಎಂಬುದಕ್ಕೆ, ಅವರು ನಿರ್ಮಿಸುವ ಸಣ್ಣ ಬಜೆಟ್‌ ಚಿತ್ರಗಳೇ ಸಾಕ್ಷಿ.
ಆದರೆ, ಅಮೀರ್ ನಟನೆಯಲ್ಲಿ ದೊಡ್ಡ ಹಿಟ್ ಚಿತ್ರ ಬಂದು ಹತ್ತಿರ ಹತ್ತಿರ 10 ವರ್ಷಗಳೇ ಆಗಿ ಹೋಗಿವೆ. ‘ಥಗ್ಸ್ ಆಫ್‌ ಹಿಂದೂಸ್ತಾನ್’ ಮತ್ತು ‘ಲಾಲ್‌ ಸಿಂಗ್ ಛಡ್ಡಾ’ದ ದೊಡ್ಡ ಸೋಲಿನ ಬಳಿಕ, ಅಮೀರ್ ಈ ಬಾರಿ ತುಂಬಾ ರಕ್ಷಣಾತ್ಮಕವಾಗಿ ಆಡಿದ್ದಾರೆ. ತಮ್ಮ ಇಮೇಜ್‌ಗೆ ಹೊಂದುವ, ಈಗಿನ ಸ್ಟಾರ್‌ ಚಿತ್ರಗಳಿಗೆ ಹೋಲಿಸಿದರೆ ಸಣ್ಣದು ಎನ್ನಬಹುದಾದ ಚಿತ್ರದೊಂದಿಗೆ ತೆರೆಗೆ ಮರಳಿದ್ದಾರೆ. ‘ತಾರೇ ಝಮೀನ್ ಪರ್’ ಚಿತ್ರದ ನೆನಪನ್ನು ಮರುಕಳಿಸುವ ಶೀರ್ಷಿಕೆ, ಈಗಾಗಲೇ ಹಿಟ್ ಆಗಿರುವ ಸ್ಪ್ಯಾನಿಷ್ ಚಿತ್ರದ ಕಥೆ, ಅಮೀರ್ ಇಮೇಜ್‌ಗೆ ತಕ್ಕ ವಿಷಯವಸ್ತು – ಹೀಗೆ ಎಲ್ಲವನ್ನೂ ಹೊಂದಿರುವ ‘ಸಿತಾರೇ ಜಮೀನ್ ಪರ್’ ಚಿತ್ರ ಅಬ್ಬರದ ಪ್ರಚಾರವಿಲ್ಲದೆ ತೆರೆ ಕಂಡಿದೆ.
ಆಟಿಸಂ ಬಗ್ಗೆ ಜಾಗೃತಿ ಮೂಡಿಸುವ ಮತ್ತು ಅವರೆಡೆಗೆ ಸೂಕ್ಷ್ಮತೆ ಬೆಳೆಸಿಕೊಳ್ಳುವ ರೀತಿಯಲ್ಲಿ ಹೆಣೆಯಲಾಗಿರುವ ಈ ಚಿತ್ರ ಸ್ಪೋರ್ಟ್ಸ್‌ ಡ್ರಾಮಾ. ಗುಲ್ಷನ್ (ಅಮೀರ್) ಒಳ್ಳೆಯ ಬಾಸ್ಕೆಟ್‌ಬಾಲ್ ಕೋಚ್. ಆದರೂ, ಒಳ್ಳೆಯ ಮನುಷ್ಯ ಎನ್ನಲು ಹಿಂಜರಿಯುವಂತೆ ಮಾಡುವ ವ್ಯಕ್ತಿತ್ವ. ಕುಡಿದು ಗಾಡಿ ಚಲಾಯಿಸಿದ ತಪ್ಪಿಗೆ ಸಮುದಾಯ ಸೇವೆಯ ಶಿಕ್ಷೆ ಪಡೆಯುವ ಅಮೀರ್, ಆಟಿಸಂ ಸ್ಟೆಕ್ಟ್ರಂನಲ್ಲಿರುವವರ ಬಾಸ್ಕೆಟ್‌ ಬಾಲ್‌ ತಂಡ ‘ಸಿತಾರ’ಕ್ಕೆ ಕೋಚ್ ಆಗಿ ಹೋಗಬೇಕಾಗುತ್ತದೆ. ರಾಷ್ಟ್ರೀಯ ಕ್ರೀಡಾಕೂಟದಲ್ಲಿ ಭಾಗವಸಹಿಸಲಿರುವ ‘ಸಿತಾರ’ ತಂಡಕ್ಕೆ ಗುಲ್ಷನ್ ಹೇಗೆ ತರಬೇತು ನೀಡುತ್ತಾನೆ ಮತ್ತು ಸಿತಾರ ತಂಡ ಗುಲ್ಷನ್‌ಗೆ ಯಾವ ರೀತಿಯ ತರಬೇತಿ ನೀಡುತ್ತದೆ ಎಂಬುದು ಕಥಾ ಹಂದರ.
ಕಥೆ ತುಂಬಾ ಸರಳ ಮತ್ತು ನೇರವಾಗಿದೆ. ಮತ್ತು ನಿರೀಕ್ಷಿಸಿದಂತೆಯೇ ಸಾಗುತ್ತದೆ. ಆಟಿಸಂ ಕುರಿತು ಚಿತ್ರ ಮಾಡುವಾಗ ಅದರಲ್ಲಿ ಹಾಸ್ಯವನ್ನು ತರುವುದು ಕತ್ತಿಯ ಮೇಲಿನ ನಡಿಗೆ. ‘ತಾರೇ ಜಮೀನ್ ಪರ್’ ಚಿತ್ರವನ್ನು ಭಾವನಾತ್ಮಕ ಚಿತ್ರವಾಗಿಸಿ ಗೆಲ್ಲಿಸುವುದು ಸುಲಭವಿತ್ತು. ಸಿತಾರೇ…. ಹಾಸ್ಯದ ಮೂಲಕ ಅದನ್ನು ಸಾಧಿಸಲು ಯತ್ನಿಸುತ್ತದೆ. ಎಲ್ಲಿಯೂ ಬಿದ್ದು ಬಿದ್ದು ನಗುವಂತಹ ಹಾಸ್ಯ ಇಲ್ಲವಾದರೂ, ಹಾಸ್ಯ ಸಂಭಾಷಣೆಗಳು ಮತ್ತು ಸಂದರ್ಭಗಳು ವಿಷಯನ್ನು ತೆಳುವಾಗಿಸಿಲ್ಲ ಮತ್ತು ಎಲ್ಲೂ ಅಸೂಕ್ಷ್ಮವಾಗಿಲ್ಲ ಎಂಬುದೇ ದೊಡ್ಡ ಹೆಗ್ಗಳಿಕೆ.
ಚಿತ್ರ ಕಲಾತ್ಮಕತೆಯ ದೃಷ್ಟಿಯಿಂದ ದೊಡ್ಡ ಸಾಧನೆಯನ್ನೇನೂ ಮಾಡಿಲ್ಲ. ಅದು ಅದರ ಉದ್ದೇಶವೂ ಅಲ್ಲ. ಸಂದೇಶ ರವಾನಿಸುವ ತನ್ನ ಮೂಲ ಉದ್ದೇಶವನ್ನು ಚಿತ್ರ ಮರೆಯುವುದೇ ಇಲ್ಲವಾದ್ದರಿಂದ, ಚಿತ್ರ ಪೂರ್ತಿ ಉಪದೇಶದಿಂದ ತುಂಬಿ ಹೋಗಿದೆ. ಪ್ರತಿ ದೃಶ್ಯವೂ ಏನೋ ಒಂದು ಸಂಗತಿಯನ್ನು ಮನವರಿಕೆ ಮಾಡಲೇ ಬೇಕೆಂದು ಪ್ರಯತ್ನಿಸುತ್ತದೆ. ಇದರಿಂದಾಗಿ ಚಿತ್ರ ಅಲ್ಲಲ್ಲಿ ‘ಸತ್ಯಮೇವ ಜಯತೆ’ಯ ಒಂದು ಎಪಿಸೋಡ್‌ನಂತೆ ಅನಿಸಲೂಬಹುದು.
ಚಿತ್ರ ಎಷ್ಟು ವಾಚ್ಯವಾಗಿದೆ ಎಂದರೆ, ಒಂದು ದೃಶ್ಯದಲ್ಲಿ ಸತತವಾಗಿ ಮಾತನಾಡುತ್ತಲೇ, ಹುರಿದುಂಬಿಸುತ್ತಲೇ ಇರುವ ಕೋಚ್ ಅಮೀರ್‌ಗೆ, ಆಟಗಾರನ ಪಾತ್ರವೊಂದು ‘ಸ್ವಲ್ಪ ಸುಮ್ಮನಿರಿ ಸಾರ್‌’ ಎನ್ನುತ್ತದೆ. ಇದು ಹಲವು ಪ್ರೇಕ್ಷಕರ ಮನದ ಮಾತನ್ನೂ ಪ್ರತಿಬಿಂಬಿಸುತ್ತದೆ. ಪ್ರೇಕ್ಷಕರಿಗೆ ಪಾಠ ಮಾಡುವ ರೀತಿಯಲ್ಲಿ ಆಟಿಸಂ ಬಗ್ಗೆ ಸಾಕಷ್ಟು ವಿಷಯಗಳನ್ನು ಹೇಳುತ್ತಲೇ ಹೋಗುವಾಗ, ಸ್ಪೂನ್‌ ಫೀಡಿಂಗ್ ಎನಿಸಿ ಬಿಡುತ್ತದೆ. ಆದರೆ, ಈ ಮಧ್ಯೆ ಸಮಾಜಕ್ಕೆ ಈ ರೀತಿಯ ಪಾಠದ ಅಗತ್ಯವೂ ಇರಬಹುದು ಎಂಬ ಭಾವನೆಯೂ ಮೂಡದಿರದು.
ಪ್ರೇಕ್ಷಕರಿಗೆ ಕ್ಲಾಸ್‌ ತೆಗೆದುಕೊಳ್ಳುವ ಭರಾಟೆಯಲ್ಲಿ ನಿರ್ದೇಶಕರು ಚಿತ್ರದ ಕಲಾತ್ಮಕತೆಯೊಂದಿಗೆ ಸಾಕಷ್ಟು ರಾಜಿ ಮಾಡಿಕೊಂಡಿದ್ದಾರೆ. ಕೆಲವು ಸಂಗತಿಗಳು ತೀರಾ ಅಸಹಜವಾದ ರೀತಿಯಲ್ಲಿ ಸರಳವಾಗಿದೆ. ಜೀವನ ಪರ್ಯಂತ ಜೊತೆಯಾಗಿದ್ದ ಫೋಬಿಯಾಗಳು ಎರಡೇ ನಿಮಿಷದಲ್ಲಿ ಸರಿಹೋಗಿಬಿಡುತ್ತವೆ, ಗುಲ್ಷನ್ ಹಿಂದಿನ ದೃಶ್ಯದಲ್ಲಿ ಮಾಡಿದ ತಪ್ಪಿಗೆಲ್ಲಾ, ಮುಂದಿನ ದೃಶ್ಯದಲ್ಲೇ ಪಾಠ ಕಲಿಯುತ್ತಾನೆ – ಹೀಗೆ. ಗುಲ್ಷನ್ ಪಾತ್ರ ಸಾಕಷ್ಟು ತಪ್ಪು ಒಪ್ಪುಗಳಿಂದ ತುಂಬಿದ್ದರೂ ಅದರಲ್ಲಿ ಒಂದು ನೈಜತೆ ಅಥವಾ ಸ್ಥಿರತೆ ಇಲ್ಲ. ಒಂದು ಕ್ಷಣ ತೀರಾ ಅಸೂಕ್ಷವಾಗಿ ವರ್ತಿಸುವ ಗುಲ್ಷನ್, ಮುಂದಿನ ಕ್ಷಣದಲ್ಲೇ ಸುಧಾರಿಸಿ ಬಿಟ್ಟಿರುತ್ತಾನೆ.
ಇದೇ ಗೊಂದಲ ಗುಲ್ಷನ್ ಮತ್ತು ಅವನ ಪತ್ನಿ ಸುನೀತಾ (ಜೆನಿಲಿಯಾ ಡಿಸೋಝಾ) ಸಂಬಂಧದಲ್ಲೂ ಇದೆ. ಸಂಬಂಧ ದೊಡ್ಡ ಮಟ್ಟಿಗೆ ಹದಗೆಟ್ಟಿದೆಯೇನೋ ಎನಿಸಿದ ಮರು ಕ್ಷಣವೇ ಇಬ್ಬರು ಪ್ರೀತಿಯಲ್ಲಿ ಮುಳುಗಿರುವ ದಂಪತಿಗಳಂತೆ ಕಾಣುತ್ತಾರೆ. ಇಬ್ಬರ ಕೆಮಿಸ್ಟ್ರಿ ಕೂಡ ಅಷ್ಟೇನೂ ಚೆನ್ನಾಗಿ ಕೆಲಸ ಮಾಡಿಲ್ಲ. ಚಿತ್ರದ ನಿಜವಾದ ತಾರೆಗಳು ಆಟಿಸ್ಟಿಕ್‌ ಮಕ್ಕಳು. ಅದ್ಭುತವಾಗಿ ನಟಿಸಿದ್ದಾರೆ ಮತ್ತು ನಗಿಸುತ್ತಾರೆ. ಎಲ್ಲೂ ತಮ್ಮ ಸ್ಥಿತಿಯನ್ನು ಮೆಲೋಡ್ರಾಮದ ಸರಕಾಗಿ ಬಳಸದೆ ತುಂಬು ಆತ್ಮವಿಶ್ವಾಸದಿಂದ ಅಭಿನಯಿಸಿ ಗೆದ್ದಿದ್ದಾರೆ.
ಚಿತ್ರದ ಯಶಸ್ಸು ಅದರಲ್ಲಿರುವ ಕೆಲವು ಸಣ್ಣ ಪುಟ್ಟ ದೃಶ್ಯಗಳ ಸೌಂದರ್ಯದಲ್ಲಿದೆ. ಸ್ಪೋರ್ಟ್ಸ್‌ ಡ್ರಾಮಾಗಳ ಅತ್ಯಂತ ಪ್ರಮುಖ ಅಂಶವಾಗಿರುವ ಅಂತಿಮ ಪಂದ್ಯದ, ಅಂತಿಮ ಗೆಲುವಿಗೆ ಚಿತ್ರ ಹೊಸ ಪರಿಭಾಷೆಯನ್ನು ಬರೆಯುತ್ತದೆ. ಆಟಿಸ್ಟಿಕ್‌ ಮಕ್ಕಳಿಂದ, ನಾಯಕನ ಪಾತ್ರವನ್ನು ಹಾಸ್ಯಮಾಡಿಸುವ ಮತ್ತು ಆ ಮೂಲಕ ಹಾಸ್ಯ ಸೃಜಿಸುವ ನಿರ್ಧಾರ ಚೆನ್ನಾಗಿ ಕೆಲಸ ಮಾಡಿದೆ. ಆದರೆ, ಮೂಲ ಚಿತ್ರದ ಕೆಲವು ದೃಶ್ಯಗಳು ಭಾರತೀಯ ಮಣ್ಣಿಗೆ ಸರಿಹೊಂದಿಲ್ಲ. ಉದಾಹರಣೆಗೆ, ಚಿತ್ರದಲ್ಲಿ ಪ್ರಾಸ್ಟಿಟ್ಯೂಟ್‌ ಪದವನ್ನು ‘ತ್ರೀ ಈಡಿಯಟ್ಸ್‌’ನ ಬಲತ್ಕಾರ್‌ ಪದದಂತೆ ಅಸೂಕ್ಷತೆಯಿಂದ ಬಳಸಲಾಗಿದೆ.
ಸಾಕಷ್ಟು ಕೊರೆತಗಳಿದ್ದರೂ, ಇತ್ತೀಚಿಗೆ ಹೊಡೆದಾಟದ, ಹಿಂಸೆಯ ವೈಭವೀಕರಣದ ಚಿತ್ರಗಳು ಸಾಲು ಸಾಲಾಗಿ ಬಿಡುಗಡೆಯಾಗುತ್ತಿರುವಾಗ ‘ಸಿತಾರೇ ಝಮೀನ್ ಪರ್’ ಒಂದು ಚಂದದ ಬದಲಾವಣೆಯಂತೆ, ಆಹ್ಲಾದ ಕೊಡುತ್ತದೆ. ತೆರೆಯ ಮೇಲೆ ರಕ್ತ, ರೋಷ, ಬಂದೂಕುಗಳ ಅಬ್ಬರವನ್ನೇ ಕೇಳಿ ಸಾಕಾಗಿದ್ದ ಸಿನಿ ಪ್ರೇಮಿಗಳಿಗೆ ಇದೊಂದು ಮುದನೀಡುವ ಬದಲಾವಣೆ. ಇಡೀ ಕುಟುಂಬ ಮಕ್ಕಳೊಂದಿಗೆ ಬಂದು ಆನಂದಿಸಬಹುದಾದ ಚಿತ್ರ. ಚಿತ್ರವನ್ನು ಸಿನಿಮ್ಯಾಟಿಕ್‌ ಉದ್ದೇಶಗಳಿಗೆ ನೋಡುವ, ಸಂದೇಶದ ಹೆಸರಲ್ಲಿ ಪ್ರೇಕ್ಷಕರಿಗೆ ಪಾಠ ಮಾಡುವುದು ಅವರ ಬುದ್ದಿವಂತಿಕೆಯನ್ನೇ ಕಡೆಗಣಿಸಿದಂತೆ ಎಂಬ ಅಭಿಪ್ರಾಯದ ವ್ಯಕ್ತಿ ನೀವಾಗಿದ್ದರೆ ಈ ಚಿತ್ರ ನಿಮಗಲ್ಲ. ಚಿತ್ರ ಉತ್ತಮ ಸಂದೇಶವನ್ನು ಹೊಂದಿರಬೇಕು ಮತ್ತು ಅದು ಗಟ್ಟಿ ಮತ್ತು ಸ್ಪಷ್ಟವಾಗಿರಬೇಕು ಎಂದು ನೀವು ಬಯಸುವವರಾದರೆ ಈ ಚಿತ್ರ ನಿಮಗೆ ಮೆಚ್ಚುಗೆಯಾಗುತ್ತದೆ.
