ಅಮೀರ್ ಖಾನ್ ನೂತನ ಸಿನಿಮಾ ಘೋಷಿಸಿದ್ದಾರೆ. ಚಿತ್ರದ ಶೀರ್ಷಿಕೆ ‘ಸಿತಾರೆ ಜಮೀನ್ ಪರ್’ ಎಂದು ನಿಗದಿಯಾಗಿದೆ. ಈ ಹಿಂದೆ ಅವರು ನಿರ್ದೇಶಿಸಿ, ನಟಿಸಿದ್ದ ‘ತಾರೆ ಜಮೀನ್ ಪರ್’ ಸಿನಿಮಾ ಡಿಸ್ಲೆಕ್ಸಿಯಾ ಕುರಿತು ಹೇಳಿತ್ತು. ಈ ಬಾರಿಯೂ ಇಂಥದ್ದೊಂದು ವಿಷಯವನ್ನು ತೆರೆಗೆ ಅಳವಡಿಸುತ್ತಿರುವುದಾಗಿ ಹೇಳಿದ್ದಾರೆ ಅಮೀರ್.
ನಟ, ನಿರ್ದೇಶಕ ಅಮೀರ್ ಖಾನ್ ಹೊಸ ಸಿನಿಮಾ ಘೊಷಣೆ ಮಾಡಿದ್ದಾರೆ. 2007ರಲ್ಲಿ ಬಿಡುಗಡೆ ಆಗಿದ್ದ ‘ತಾರೆ ಜಮೀನ್ ಪರ್’ ಸಿನಿಮಾದ ರೀತಿಯಲ್ಲಿಯೇ ಇನ್ನೊಂದು ಕಥೆಯನ್ನು ಇಟ್ಟುಕೊಂಡು ‘ಸಿತಾರೆ ಜಮೀನ್ ಪರ್’ ಎಂಬ ಶೀರ್ಷಿಕೆಯ ಸಿನಿಮಾ ಮಾಡಲಿದ್ದಾರೆ. ಅವರ ಲೇಟೆಸ್ಟ್‌ ಸಿನಿಮಾ ‘ಲಾಲ್ ಸಿಂಗ್ ಛಡ್ಡಾ’ ಬಾಕ್ಸ್‌ ಆಫೀಸ್‌ನಲ್ಲಿ ನಿರೀಕ್ಷಿಸಿದ ಯಶಸ್ಸು ಕಾಣಲಿಲ್ಲ. ಹಾಗಾಗಿ ಅಮೀರ್ ಹೊಸ ಸಿನಿಮಾ ಘೋಷಿಸಲು ಸಾಕಷ್ಟು ಸಮಯ ತೆಗೆದುಕೊಂಡರು. ಈಗ ಮುಂದಿನ ಸಿನಿಮಾ ಬಗ್ಗೆ ಅವರು ಮಾಹಿತಿ ಹಂಚಿಕೊಂಡಿದ್ದಾರೆ. ಅಲ್ಲದೇ ಈ ಸಿನಿಮಾದ ಕಾನ್ಸೆಪ್ಟ್ ಏನು ಎಂಬುದನ್ನು ಕೂಡ ಅವರು ವಿವರಿಸಿದ್ದಾರೆ. ಅಮಿರ್ ಖಾನ್ ನಿರ್ದೇಶಿಸಿ, ನಟಿಸಿದ್ದ ‘ತಾರೆ ಜಮೀನ್ ಪರ್’ ಸಿನಿಮಾ ಓದಲು, ಬರೆಯಲು ಕಷ್ಟಪಡುವ (ಡಿಸ್ಲೆಕ್ಸಿಯಾ) ಬಾಲಕನ ಕುರಿತ ಚಿತ್ರವಾಗಿತ್ತು. ಈಗ ನೂತನ ಚಿತ್ರದಲ್ಲೂ ಇಂಥದ್ದೊಂದು ಕಥಾವಸ್ತು ಇರಲಿದೆ ಎನ್ನುತ್ತಾರವರು.
‘ನಾನು ಈ ವಿಚಾರದ ಬಗ್ಗೆ ಬಹಿರಂಗವಾಗಿ ಈವರೆಗೂ ಮಾತನಾಡಿಲ್ಲ. ಈಗ ಹೆಚ್ಚೇನೂ ಹೇಳಲು ಸಾಧ್ಯವಿಲ್ಲ. ಆದರೆ ಈ ಸಿನಿಮಾದ ಶೀರ್ಷಿಕೆ ಏನು ಎಂಬುದನ್ನು ಹೇಳುತ್ತೇನೆ. ‘ಸಿತಾರೆ ಜಮೀನ್ ಪರ್’ ಎಂದು ನಿಗಧಿಯಾಗಿದೆ. ನಿಮಗೆ ನನ್ನ ‘ತಾರೆ ಜಮೀನ್ ಪರ್’ ಸಿನಿಮಾ ನೆನಪಿರಬಹುದು. ಈಗ ಅಂಥದ್ದೇ ಒಂದು ವಿಷಯವನ್ನು ತೆರೆಗೆ ಅಳವಡಿಸಲಿದ್ದೇನೆ. ಅಂದು ‘ತಾರೆ ಜಮೀನ್ ಪರ್’ ಸಿನಿಮಾ ಭಾವನಾತ್ಮಕವಾಗಿತ್ತು. ನಿಮ್ಮನ್ನೆಲ್ಲ ಅಳಿಸಿತ್ತು. ಆದರೆ ಈಗ ‘ಸಿತಾರೆ ಜಮೀನ್ ಪರ್’ ಚಿತ್ರ ನಿಮ್ಮನ್ನೆಲ್ಲಾ ನಗಿಸಿ ಮನರಂಜನೆ ನೀಡುತ್ತದೆ’ ಎಂದು ಆಮಿರ್ ಖಾನ್ ಹೇಳಿದ್ದಾರೆ. ಇದಲ್ಲದೇ ಅಮೀರ್ ನಿರ್ಮಾಣದಲ್ಲೂ ಸಕ್ರಿಯರಾಗಿದ್ದು, ಒಟ್ಟಿಗೇ ಮೂರು ಸಿನಿಮಾಗಳನ್ನು ನಿರ್ಮಿಸುತ್ತಿದ್ದಾರೆ.
