ತೆಲುಗು ಓಟಿಟಿ ಫ್ಲಾಟ್‌ಫಾರ್ಮ್‌ ‘ಆಹಾ’ದ ಟಾಕ್‌ಶೋನಲ್ಲಿ ನಂದಮೂರಿ ಬಾಲಕೃಷ್ಣ ಕಾಣಿಸಿಕೊಳ್ಳಲಿದ್ದಾರೆ. ಈ ಮೂಲಕ ಅವರ ಓಟಿಟಿಗೆ ಅವರ ಪ್ರವೇಶವಾಗಲಿದೆ.
ನಂದಮೂರಿ ಬಾಲಕೃಷ್ಣ ತೆಲುಗು ಚಿತ್ರರಂಗದ ಜನಪ್ರಿಯ ನಟ. ಲಾರ್ಜರ್‌ದ್ಯಾನ್‌ ಲೈಫ್‌ ಇಮೇಜಿನ ಪಾತ್ರಗಳ ಮೂಲಕ ಅವರು ತಮ್ಮದೇ ಒಂದು ಹಾದಿ ಸೃಷ್ಟಿಸಿಕೊಂಡಿದ್ದಾರೆ. ಅಬ್ಬರ – ಆರ್ಭಟದ ಡೈಲಾಗ್‌, ಬಿಲ್ಡಪ್‌ ಹೀರೋಯಿಸಂನಿಂದಾಗಿ ಅವರ ಪಾತ್ರಗಳು ಕೆಲವೊಮ್ಮೆ ಹಾಸ್ಯಾಸ್ಪದ ಎನಿಸುವುದೂ ಇದೆ. ಇದೀಗ ಅವರು ಟಾಕ್‌ಶೋ ನಿರೂಪಕರಾಗಿ ಹೇಗೆ ಕಾಣಿಸಿಕೊಳ್ಳಬಹುದು ಎನ್ನುವ ಕುತೂಹಲ ಸಿನಿಪ್ರೇಮಿಗಳದ್ದು. ಚಿತ್ರನಿರ್ದೇಶಕ ಕ್ರಿಷ್ ಜಗರ್ಲಮುಡಿ ಈ ಟಾಕ್‌ ಶೋ ನಿರ್ದೇಶಿಸಲಿದ್ದು, ಮುಂದಿನ ದಿನಗಳಲ್ಲಿ ಈ ಕುರಿತಾಗಿ ಹೆಚ್ಚಿನ ಮಾಹಿತಿ ಲಭ್ಯವಾಗಲಿದೆ.
ತೆಲುಗಿನ ಜನಪ್ರಿಯ ಓಟಿಟಿ ಫ್ಲಾಟ್‌ಫಾರ್ಮ್‌ ‘ಆಹಾ’ ಈ ಹಿಂದೆ ನಟಿ ಸಮಂತಾ ನಿರೂಪಣೆಯಲ್ಲಿ ‘ಸ್ಯಾಮ್ – ಜಾಮ್‌’ ಶೋ ರೂಪಿಸಿತ್ತು. ನಟಿ ಲಕ್ಷ್ಮೀ ಮಂಚು ಅವರು ಈ ಓಟಿಟಿಗಾಗಿ ‘ಆಹಾ ಭೋಜನಾಂಬು’ ಅಡುಗೆ ಶೋ ನಡೆಸಿಕೊಟ್ಟಿದ್ದರು. ಸದ್ಯ ‘ಆಹಾ’ದಲ್ಲಿ ‘ನಂ.1 ಯಾರೀ’ ಸೀಸನ್‌ 3 ಸ್ಟ್ರೀಮ್ ಆಗುತ್ತಿದೆ. ‘ಬಾಹುಬಲಿ’ ಖ್ಯಾತಿಯ ನಟ ರಾಣಾ ಶೋ ನಿರೂಪಿಸುತ್ತಿದ್ದಾರೆ. ಇನ್ನು ನಟ ಬಾಲಕೃಷ್ಣ ಮೊನ್ನೆಯಷ್ಟೇ ‘ಅಖಂಡ’ ತೆಲುಗು ಸಿನಿಮಾ ಚಿತ್ರೀಕರಣ ಪೂರ್ಣಗೊಳಿಸಿದ್ದಾರೆ. ‘ಸಿಂಹ’ ಮತ್ತು ‘ಲೆಜೆಂಡ್‌’ ಚಿತ್ರಗಳ ನಂತರ ನಿರ್ದೇಶಕ ಬೊಯಪಾಟಿ ಸೀನು ಅವರೊಂದಿಗೆ ಬಾಲಕೃಷ್ಣರದ್ದು ಇದು ಮೂರನೇ ಸಿನಿಮಾ.
